ਲੁਧਿਆਣਾ ਮੇਅਰ ਦੀ ਕੋਠੀ ਘੇਰਨ ਪਹੂੰਚੇ ਸਫਾਈ ਕਰਮਚਾਰੀਆਂ ਅਤੇ ਕੌਂਸਲਰ

(ਕੁਨਾਲ ਚੋਪੜਾ) ਲੁਧਿਆਣਾ ਵਿੱਚ 21 ਸਤੰਬਰ 2026 ਨੂੰ ਸਫਾਈ ਵਿਵਸਥਾ ਦੇ ਨਵੇਂ ਪ੍ਰੋਜੈਕਟ ਨੂੰ ਲੈ ਕੇ ਮਾਹੌਲ ਬਹੁਤ ਗਰਮਾ ਗਿਆ। ਨਗਰ ਨਿਗਮ ਦੇ ਕਾਂਗਰਸ ਕੌਂਸਲਰ ਅਤੇ ਐੱਫ.ਐਂਡ.ਸੀ.ਸੀ. (F&CC) ਮੈਂਬਰ ਗੌਰਵ ਭੱਟੀ ਸਫਾਈ ਕਰਮਚਾਰੀਆਂ ਨਾਲ ਮਿਲ ਕੇ, ਸਫਾਈ ਵਿਵਸਥਾ ਨੂੰ ਨਿੱਜੀ ਹੱਥਾਂ (ਪ੍ਰਾਈਵੇਟ ਕੰਪਨੀਆਂ) ਵਿੱਚ ਸੌਂਪਣ ਦੇ ਵਿਰੋਧ ਵਜੋਂ ਮੇਅਰ ਇੰਦਰਜੀਤ ਕੌਰ ਦੀ ਕੋਠੀ (ਮੇਅਰ ਹਾਊਸ) ਦਾ ਘੇਰਾਓ ਕਰਨ ਪਹੁੰਚੇ। ਇਸ ਦੌਰਾਨ ਪ੍ਰਦਰਸ਼ਨਕਾਰੀਆਂ ਅਤੇ ਪੁਲਿਸ ਵਿਚਾਲੇ ਤਿੱਖੀ ਬਹਿਸਬਾਜ਼ੀ ਹੋਈ ਅਤੇ ਆਹਮੋ-ਸਾਹਮਣੇ ਮਾਹੌਲ ਕਾਫੀ ਤਣਾਅਪੂਰਨ ਹੋ ਗਿਆ

ਅਨੋਖਾ ਵਿਰੋਧ ਪ੍ਰਦਰਸ਼ਨ: ਕੌਂਸਲਰ ਗੌਰਵ ਭੱਟੀ ਸਫਾਈ ਕਰਮਚਾਰੀਆਂ ਦੀਆਂ ਖਾਲੀ ਰੇਹੜੀਆਂ ਲੈ ਕੇ ਆਪਣੇ ਜਮਾਲਪੁਰ ਦਫ਼ਤਰ ਤੋਂ 12 ਕਿਲੋਮੀਟਰ ਨੰਗੇ ਪੈਰੀਂ ਪੈਦਲ ਮਾਰਚ ਕਰਦੇ ਹੋਏ ਮੇਅਰ ਹਾਊਸ ਪਹੁੰਚੇ ਸਨ।
ਪ੍ਰਾਈਵੇਟ ਪ੍ਰੋਜੈਕਟ ਦਾ ਵਿਰੋਧ: ਪ੍ਰਦਰਸ਼ਨਕਾਰੀਆਂ ਦਾ ਦੋਸ਼ ਹੈ ਕਿ ਨਗਰ ਨਿਗਮ ਵੱਲੋਂ ₹1,198 ਕਰੋੜ ਦਾ ਸਾਲਿਡ ਵੇਸਟ ਮੈਨੇਜਮੈਂਟ ਪ੍ਰੋਜੈਕਟ ਲਿਆ ਕੇ ਸਫਾਈ ਦਾ ਕੰਮ ਨਿੱਜੀ ਕੰਪਨੀਆਂ ਨੂੰ ਦਿੱਤਾ ਜਾ ਰਿਹਾ ਹੈ, ਜਿਸ ਨਾਲ ਗਰੀਬ ਸਫਾਈ ਸੇਵਕਾਂ ਦਾ ਰੁਜ਼ਗਾਰ ਖ਼ਤਰੇ ਵਿੱਚ ਪੈ ਜਾਵੇਗਾ।
ਘੋਟਾਲੇ ਦੇ ਇਲਜ਼ਾਮ: ਕੌਂਸਲਰ ਨੇ ਇਲਜ਼ਾਮ ਲਗਾਇਆ ਕਿ ਜਿਹੜਾ ਕੰਮ ਨਿਗਮ ਇਸ ਵੇਲੇ ₹1,000 ਵਿੱਚ ਕਰਵਾ ਰਿਹਾ ਹੈ, ਉਸੇ ਕੰਮ ਲਈ ਨਵੇਂ ਪ੍ਰੋਜੈਕਟ ਤਹਿਤ ਪ੍ਰਤੀ ਟਨ ₹3,677 ਦੇਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ, ਜੋ ਜਨਤਾ ਦੇ ਟੈਕਸ ਦੇ ਪੈਸੇ ਦੀ ਬਰਬਾਦੀ ਹੈ।
ਪੁਲਿਸ ਨਾਲ ਖੜਕੀ: ਮੇਅਰ ਦੀ ਕੋਠੀ ਦੇ ਬਾਹਰ ਲਗਾਏ ਗਏ ਪੁਲਿਸ ਬੈਰੀਕੇਡਾਂ ਕਾਰਨ ਜਦੋਂ ਪ੍ਰਦਰਸ਼ਨਕਾਰੀਆਂ ਨੂੰ ਰੋਕਿਆ ਗਿਆ, ਤਾਂ ਸਫਾਈ ਕਰਮਚਾਰੀਆਂ ਅਤੇ ਕੌਂਸਲਰਾਂ ਦੀ ਪੁਲਿਸ ਨਾਲ ਜਬਰਦਸਤ ਖਿੱਚਧੂਹ ਅਤੇ ਬਹਿਸ ਹੋਈ, ਜਿਸ ਨਾਲ ਮੌਕੇ ‘ਤੇ ਹੰਗਾਮਾ ਖੜ੍ਹਾ ਹੋ ਗਿਆ।